2 Kings 5
1 敘利亞軍隊个元帥乃縵被厥國王當看重，因為上主識通過佢使敘利亞軍隊得到勝利。乃縵係一個大能个勇士，總係卻發到癩病。
2 有一擺，敘利亞人歸陣出去搶以色列人，捉到一個以色列人个細妹仔；這細妹仔後來做乃縵𡜵娘个使女。
3 姖㧯女主人講：「盼望主人去見住在撒馬利亞个先知！佢一定會醫好主人个癩病。」
4 乃縵就去見王，將該對以色列來个細妹仔講个話詳細㧯王講。
5 敘利亞王講：「好，做你去！𠊎也會寫信仔給以色列王。」所以乃縵就出發，帶等三萬隻銀幣、六千隻金幣、㧯十套衫褲。
6 佢帶給以色列王个信仔恁樣講：「這封信介紹𠊎个大臣乃縵，你愛醫好佢个癩病。」
7 以色列王讀到這封信，就扯裂自家个衫，講：「𠊎又毋係上帝，㖠有辦法喊人生、喊人死？該儕樣般做得喊𠊎醫好這個人个癩病呢？你等看！佢定著係想愛尋把柄來攻擊𠊎！」
8 神人以利沙聽到以色列王扯裂衫个事，就喊人去對王講：「做麼介扯裂衫呢？喊佢來尋𠊎，佢就會知以色列有一個先知！」
9 所以，乃縵帶等馬㧯戰車來到以利沙屋下个門口。
10 以利沙喊一個僕人出去㧯乃縵講：「你去約旦河洗七擺身，恁樣，你个皮肉就會復原，變做淨浰。」
11 乃縵就閼到氣浡浡，轉身就走。佢講：「𠊎恅到佢一定會出來看𠊎，企等向上主—佢个上帝祈禱，在𠊎發病个所在擛一下手，醫好𠊎个癩病！
12 再講，大馬士革个亞罷拿河㧯法珥河，敢無比以色列所有个河壩還較好嗎？𠊎在該位洗身敢毋會得到淨浰？」所以佢當發譴就離開。
13 乃縵个僕人行前來對佢講：「先生，就算先知喊你做一件困難个事，你敢毋會去做嗎？何況佢這下只有喊你去洗身就會得到淨浰呢？」
14 所以乃縵就到約旦河去，照神人个吩咐在河壩肚浸七擺。佢就變做淨浰。佢个皮肉復原到像細人仔个共樣。
15 乃縵帶等所有跈等來个人轉到神人該位，企在佢面前講：「這下𠊎知，除了在以色列以外，全世界無別个真神上帝。請你就收下僕人个禮物啊！」
16 以利沙講：「𠊎指等𠊎所事奉个永生上主發誓，𠊎麼介都毋接受。」乃縵堅持愛佢收，佢還係毋肯收。
17 所以乃縵講：「若係你毋接受僕人个禮物，恁樣，請俾𠊎裝一對騾仔載得贏个泥轉屋下去；因為對這下起，除了上主以外，𠊎毋向別个神明獻燒化祭抑係其他个祭。
18 唯獨一項事，愛求上主赦免僕人！𠊎个主人入臨門廟拜神明个時節，𠊎愛用手扶佢入廟，也愛行禮。𠊎在臨門廟行禮个事，願上主赦免𠊎。」
19 以利沙講：「做你平安轉去！」乃縵就離開該位。乃縵正行無幾遠，
20 神人以利沙个僕人基哈西心肚想：「吾主人毋收乃縵半樣禮物就讓佢走！佢應該收該敘利亞人个禮物正著。𠊎對永生上主發誓，𠊎愛追到佢，向佢討兜東西。」
21 所以，基哈西起身去追乃縵。乃縵看到有人追來，就對戰車頂下來見佢，講：「有麼介事？」
22 基哈西講：「無麼介事！𠊎主人派𠊎來㧯你講，頭下有兩個後生个先知對以法蓮山區來，佢希望你給佢等三千隻銀幣㧯兩身衫褲。」
23 乃縵講：「請你拿六千隻銀幣去！」佢勉強佢收，然後將銀幣裝在兩隻袋仔肚，連同兩身衫褲，交給自家个僕人，喊佢等在基哈西頭前扛等行。
24 佢等到以利沙住个山岡，基哈西將該兩袋東西搬入屋肚，然後請乃縵个僕人轉去。
25 基哈西入去主人个屋肚；以利沙問佢：「基哈西，你去㖠位？」佢應講：「僕人無去㖠位。」
26 總係以利沙講：「該人對戰車下來迎接你个時，𠊎个心敢毋係也㧯你共下在該位？這下毋係接受人个銀幣、衫褲、橄欖園、葡萄園、牛羊、奴僕㧯奴婢个時節！
27 因為恁樣，乃縵个癩病會遰到你身上㧯你个後代身上，直到永遠。」基哈西離開个時，就遰到癩病，皮膚像雪恁白。